- grettir.net

Ég fór með eldri dóttur mína í tveggja og hálfs árs skoðun í morgun þar sem hún skoraði "himinhátt" eins og hjúkrunarkonan orðaði. 91 stig af 100 mögulegum.

Að teikna virðist ekki vera hennar sterka hlið og dró það hana niður. Hreyfiþroski, fínhreyfingar, málfar og önnur snilligáfa er hennar sterka hlið.

Hún hefur líka stækkað gríðarlega, um heila 11 cm á einu ári og orðið stór miðað við aldur - en hún var alltaf tveimur staðalfrávikum undir kúrfu eins og það er kallað.

Það þarf varla að taka það fram að pabbinn var að rifna úr monti yfir stúlkunni þegar niðurstöður lágu fyrir - þó þær hafi ekki komið neitt á óvart.

Í öðrum löndum er haustið lengi að koma sér fyrir með tilheyrandi litadýrð, uppskeru ávaxta og hægt kólnandi veðri.

Á Íslandi kemur eitt gott rok og allt laufið liggur dautt í garðinum.

Hin daglega rútína er hafin á ný en hún hefur verið úr skorðum undanfarið vegna nýja fjölskyldumeðlimsins.

Ég mætti ferskur til vinnu rúmlega níu, búinn að hjóla með "gömlu börnunum" í skóla og leikskóla og hjóla loks til vinnu.

Haustvindhviðan kom í nótt og breytti sumri í haust í einni svipan.

Eftir einn kaffibolla og einn fund er ég tilbúinn fyrir langan vetur.

Rétt fyrir kvöldmat í gær eignaðumst við hjón aðra stelpu.
Fyrir þá sem eru að halda tölu yfir börn á heimilinu þá eigum við nú einn stóran strák, eina millistóra stelpu og eina agnarsmáa.

Sú nýjasta hefur fengið það frábæra nafn Þórdís Birna. Við fæðingu vó hún 2440 grömm (10 merkur tæpar) og var heilir 44 cm (en ekki 45 eins og ég laug blákalt í sms-i í hita leiksins í gær).

Við erum orðin fimm manna fjölskylda með þessari ágætu viðbót og stóru systkinin geta ekki beðið eftir því að fá þá stuttu heim.

Myndavélin er enn uppi á spítala, svo myndir verða að bíða, en ég er komin heim með "gömlu" börnin og er að fara að elda og koma þeim í bað.

Nú er maður sko orðinn fullorðinn :-)