- grettir.net

Við skrúfuðum hjálpardekkin af reiðhjóli drengsins í byrjun vikunnar. Stór dagur í lífi hans. Hann er með nokkra marbletti, en engin stórslys hafa enn hlotist af þessu.

Dóttirin skríður nú á methraða um allt hús og er farin að sýna tilburði til að standa upp.
Við erum líka alltaf að reyna að fá hana til að segja mamma og pabbi en með góðum vilja má skilja bablið í henni sem pabba og mamma.

Þegar við sitjum með henni og segjum "Segðu pabbi.. segðu mamma.." kemur stundum bróðir hennar, horfir beint framan í hana og segir hægt og skýrt: "Segðu Stóri bróðir!"

Það er ekki hlustandi á útvarp nú orðið.
Ég klaufaðist til að stilla á X-ið sem í gegnum tíðina hefur verið skásti kosturinn í stöðunni og er þá ekki Valtýr Björn með alveg mökkleiðinlegan þátt um íþróttir. ÍÞRÓTTIR!

For fucks sake - er ekki nóg af íþróttaþvaðri á öllum stöðvum allstaðar þó ekki sé spes þáttur á X-inu með Valtý Birni.

X-ið er farið úr minninu á mínu útvarpi. Nú er suð á öllum sex stöðvum.

Það er eins gott að fara ekki með fjarstýrða bílinn sinn í Hafnarfjörðinn. Á forsíðu fréttablaðsins í dag er þessi frétt:

Lögreglumál "Maður veit ekkert hvað hefði gerst ef ég hefði ekki slökkt á bílnum eins og hann sagði," segir Gunnar Þór Gunnarsson, íbúi að Hverfisgötu í Hafnarfirði.

Gunnar segir að nágranni sinn hafi komið út vopnaður haglabyssu og hótað að skjóta fjarstýrðan bensínbíl Gunnars ef hann myndi ekki slökkva á honum hið snarasta.

Lögreglan kom á staðinn og handtók manninn. Þrjú skotvopn voru gerð upptæk ásamt skotfærum samkvæmt heimildum Fréttablaðsins.

Ég les oftast bakþanka fréttablaðsins og oftar en ekki eru þeir skemmtilegir og vekja mann til umhugsunar um fólk og málefni líðandi stundar.

Langskemmtilegastur finnst mér Dr. Gunni og hlæ oftar en ekki upphátt að pistlunum hans. Flestir aðrir pennar eru ágætir. Ég nenni þó sjaldnast að lesa Billjónsdagbók Jóns Arnar þar sem hann setur sig á afar kjánalegan hátt inn í hugarheim billjónamærings.

Um daginn kvartaði Davíð Þór undan gaspri á Internetinu - fannst að sér vegið þegar netverjar voru að kvarta undan íslenskri þýðingu Simpsons fjölskyldunnar.
Að vissu leyti skil ég Davíð, enda fátt leiðinlegra en gaspur á interneti, en ég gúgglaði að gamni þetta dæmi sem hann vitnar í og fann heimasíðu 11 ára drengs sem fannst "discrace" að Simspons væri íslenskaður.

Ég man óljóst eftir því hvernig er að vera 11 ára, en ég hefði ekki verið til í að sjá aftan á Fréttablaðinu tilvitnun í lélega ensku sem ég hefði óvart látið út úr mér á Internetinu.

Svo stórt verkefni sem talsetning Simspons hlýtur að bjóða upp á að aðdáendur verði ekki allir yfir sig hrifnir og ef menn þola ekki gagnrýni 11 ára krakka, þá ættu menn ekki að taka svona verkefni að sér. Ég hef reyndar ekki heyrt íslensku útgáfuna, en hún ku vera ágæt, svo ég held að aðstandendur þurfi ekki að skammast sín og hljóta að geta horft framhjá einhverju net röfli.

Talandi um netröfl. Rakst á þetta fyrir tilviljun þegar ég las mbl.is án Firefox og neyddist til að sjá bloggana við fréttirnar:
Bloggarar eru hálfvitar

Athugasemdirnar staðfesta svo algerlega það sem maðurinn er að segja.

Okkur gafst ekki tími til að þræða miðbæinn í leit að atburðum að þessu sinni, en létum okkur nægja að fara á tónleikana á Miklatúni.

Þar sáum við:
Mínus
Magna
Megas
Mannakorn

og einhverja fleiri sem ekki byrja á M.
Pétur Ben var líklega bestur af þeim. Hann verður líklega að skipta í listamannanafnið Mr. Ben til að falla í hópinn.

Við komumst ekki á tónleikanna á föstudagskvöldið frekar en í afmæli von ölves (mér þykir það ákaflega leitt Óli.. við tökum bjór við tækifæri), en ég sá einhverjar glefsur í sjónvarpinu og sýndist þetta vera ágætlega heppnað mætingalega séð.
Mugison var snilld, en það var of mikið af sveitum sem eru að reyna rísa upp frá dauðum. Líkið bara neitar að rísa með.

Ég fékk að prófa crossara í gær - eða drullumallara eins og svona mótorhjól eru gjarnan kölluð.

Ég er ennþá með æðaslátt í höndunum eftir að reyna að halda mér á baki. Ég fór þrjá hringi og datt í þeim seinasta þegar ég var aðeins farinn að þora að gefa tryllitækinu inn. Ég var svo þreyttur að ég ætlaði ekki að koma hjólinu í gang aftur.

En gaman var það.

Á hverjum mánudegi fæ ég reminder frá tímakortakerfinu um að senda tímakortið.

Á hverjum mánudegi opna ég tómt kort og þarf að fylla inn alla tíma síðustu viku. Það er í sjálfu sér ekkert mál, því flest er unnið samkvæmt beiðnum eða eru fundir sem eru skráðir í Outlook.
Þetta er bara handavinna.

Ég var alveg að verða búinn með kortið mitt áðan og var að skrá 1,75 tíma á eitthvað djobb á föstudaginn, nema ég ýtti óvart á F5 í stað 5 (sem er beint fyrir ofan).

Allir tímar vikunnar hurfu, því ég átti eftir að ýta á "Vista".

Svona eiga mánudagar að vera! Pain in the ass..

Jæja, best að byrja upp á nýtt.

Naumast að borgarstjórinn okkar er hress. Nú vill hann Átvr burt úr miðbænum. Maður gæti haldið að hann ætti veitingastað í götunni sem verður af viðskiptum, en svo gott er það nú ekki. Þetta er líklega fyrsta skrefið í þurrkun miðbæjarins.
Fyrst ríkisokurbúlluna burt og svo verða vínveitingaleyfi staðanna í kring ekki endurnýjuð.

Rokk að kjósa yfir sig svona forræðishyggju flokk sem segist vera hægri en er líklega kominn svo langt til hægri að hann er orðinn öfga vinstri.

Ég legg til að fólk skrifi þetta hjá sér svo það verði ekki sömu mistök talin upp úr kjörkössunum næst.

Ég fékk nýjustu afurð The Smashing Pumpkins í hendurnar áðan. Zeitgeist heitir gripurinn.
Billy Corgan hefur engu gleymt og við fyrstu hlustun virkar diskurinn tussugóður.

Einhver slefandi aumingi með hor keyrði spegilinn af konubílnum um kvöldmatarleytið í gær og stakk af.

Þegar ég finn samstæðu (brotinn spegil hægra megin) þá hlýtur eigandinn verra af. Ef þetta var helvítis strætó druslan sem keyrir alltaf á öðru hundraðinu hérna framhjá, þá verður Villi borgarstjóri að opna stóra ávísanaheftið.

Nei, í alvöru. Hvað er að svona liði sem ber enga virðingu fyrir annarra manna hlutum? Ég er frekar reiður yfir þessum aumingjaskap.

Við erum búin að grafa djúpa holu í enda garðsins og notum hana til að grilla holulæri.

Það fer þannig fram að við fyllum botn holunar með kolum, setjum læri í álpappír ofan á kolin og setjum torfu ofan á. Þetta er æði.

Dóttir mín byrjaði að skríða um helgina. Nú skríður hún um allt hús, eltandi bolta og fiktandi í öllu sem er í gólfhæð.

Ef hún leggur af stað í kvöld nær hún líklega tónleikunum á Miklatúni á laugardaginn.

Það er eitthvað verkstæði hérna við hliðina á vinnunni minni sem annaðhvort setur þjófavarnir í bíla eða er alltaf að prófa þjófavörnina á bíl eins starfsmannsins.

Hvort heldur sem er, þá pípir bílkvikindið á korters fresti. Ef vörnin er biluð þá er eigandinn eflaust ekki vinsælastur í hverfinu og einn morguninn á hann eftir að koma að bílnum sínum í buffi.

Ég sá að skráning er hafin í Latabæjar maraþonið. Ætli ég láti það ekki duga í ár. Ég hljóp 10 km í fyrra og var í 1200sta sæti eða eitthvað álíka.

Ég tek ekki sénsinn á að ég verði lélegri en í fyrra, en það eru góðar líkur á því enda kjötát, bjórþamb og hreyfingarleysi verið með meira móti eftir að ég smíðaði pallinn.

Konan mín er einum endajaxli fátækari en þegar hún vaknaði í morgun.

Vonandi verður það til þess að framtönnin í dóttur minni kemur niður í dag. Alheimurinn verður að halda jafnvægi.

Fyrir nokkrum árum voru ansi hressandi auglýsingar aftan á strætisvögnum sem sýndu smokk með eiturlyfjum og fyrir ofan myndina var textinn úr hvaða rassi?

Þessi frétt á rúv um kókaín smyglið fyrir rúmri viku minnti mig á þessar auglýsingar og finnst skrýtið að svoleiðis áróðri hafi ekki verið haldið áfram - svo ég vitni í fréttina:

en samkvæmt heimildamönnum var um helmingur efnisins í endaþarmi og nærbuxum hans, hinn helmingurinn í stúlkunni.

Jömmí..

Ég gerði vel við mig og mína um helgina og fór á The Simpsons Movie í lúxus sal um helgina.

Hún er æðisleg þessi mynd.

Þegar ég leit út um gluggann í morgun sá ég að þjóðhátíðarveðrið lét ekki á sér standa frekar en fyrri ár. Heppinn er ég að þurfa ekki að láta okra á mér hundblautum á þeirri eyjunni eina ferðina enn.

Ég læt bara okra á mér hundblautum á stóra skerinu í staðinn.