- grettir.net

Ég er búinn að hafa það ansi fínt undanfarna mánuði, vinnandi hálfan daginn og knúsandi nýju dóttur mína hinn helminginn. En öll gleði tekur enda fyrr en síðar. Þann 1. júní byrja ég að vinna fulla vinnu. Þá tekur alvara lífsins við eins og einhver orðaði það.

Það styttist sem betur fer í sumarfrí :-)

Ég hef komið sjálfum mér á óvart undanfarna daga. Pallurinn er að verða tilbúinn og ég hef sveiflað hamri eins og vindurinn. Við tókum general prufu í gær og grilluðum á þeim helming sem er kominn með gólf.

Í fyrradag mokaði ég moldarhaugnum í trjábeðin með hjólbörur og minigröfu að vopni. Ég fékk aðstoð seinnipartinn þegar pabbi og Axel bróðir mættu á svæðið, hreinsuðu upp restina og fjarlægðu gröfuna úr garðinum.

Eina sem á eftir að gera í hreinsunarstörfum nú er að fjarlægja afgangstimbur og trjábolinn sem þurfti að moka í burtu. Hann er á stærð við fólksvagn. Ég brytja hann niður í rólegheitunum.

Aukaverkanir af svona dugnaði eru harðsperrur frá nefi og niðurúr, blöðrur á öllum fingrum og mold undir nöglum.

Þegar ég stend á tilbúnum pallinum, með bjór í annarri og grilltöng í hinni þá verður þetta allt þess virði. Þá horfi ég á pallinn minn en ekki pallinn sem ég fékk þrjá smiði til að smíða fyrir mig.

Ég á afmæli í dag. Flestir sem ná svo hárri elli sem ég finnst ekki skemmtilegt að halda upp á daginn. Halda honum jafnvel leyndum.

Ekki ég. Og ég á bestu konu í öllum heiminum. Hún gaf mér nokkuð sem mig hefur dreymt um frá því ég var lítinn drengur. Hún gaf mér fjarstýrðan bensínbíl í afmælisgjöf!

Þetta er nýji bíllinn. Blár eins og BMW-inn.

Þetta tefur pallasmíðina um einhverjar vikur.

Ég er að horfa á Barnyard teiknimyndina og sé að þar eru nautin með júgur. Þetta er væntanlega til að koma í veg fyrir að amerískir foreldrar þurfi að svara erfiðum spurningum varðandi muninn á kynjunum - ekki mega stúlkubörn til dæmis vera ber að ofan á ströndum Flórída.

Mér þykja það einkennileg rök Vinstri Grænna að þeir séu sigurvegarar kosninganna og því eigi þeir meiri rétt á því en Samfylking að vera í ríkisstjórn. "Sigurvegarar" því þeir bættu við sig fjórum mönnum.

Þeir eru þrátt fyrir þessa fjóra menn helmingi færri á þingi en Samfylking og eiga því ekki rétt á setu í ríkisstjórn frekar en ég.

Ef einhver ræki stjórnmálaflokk með einum þingmanni og bætti við sig einum til viðbótar þá er það helmings aukning og sá flokkur því "sigurvegari" á mælikvarða Vinstri Grænna. Sá flokkur hefði því væntanlega umboð til myndunar ríkisstjórnar með sömu rökum?

Þetta hljómar eins og Framsóknarflokks rökfærsla.

Framsóknarflokkur er því miður enn inni á þingi. Það þýðir að hann kemur til með að útdeila þægilegum stöðum til sinna manna og kvenna næstu fjögur árin.
Hvaðan kom til dæmis þessi Jón Sigurðsson formaður flokksins? Ekki minnist ég þess að hann hafi verið í framboði 2003. Æjá, alveg rétt... hann var hirtur upp af ruslahaugunum inni í Seðlabanka til að taka við formennsku af Halldóri, því engum sitjandi þingmanni flokksins var treyst til formennsku.

Því miður tókst ekki að útrýma þessum anskotans flokk og þeir virðast ekki skilja að kjósendur voru að senda þeim skýr skilaboð. Tala bara um endurskipulagningu og nýja stefnu og einhvern þvætting. Þeir ættu kannski að endurskoða landbúnaðarstefnuna og spillinguna innan flokksins. Ekki það að ég muni nokkurn tíma skipta um skoðun á þessum flokki.

Ef Sjálfstæðisflokkurinn gengur enn einu sinni í sæng með þessari úreltu spilltu flokksómynd þá er ekki víst að þeir fái eins góða kosningu næst.

Hvenær ætlar svo Samfylkingin að átta sig á því að Össur er Samfylkingin og Ingibjörg er Kvennalistinn? Ég þekki fullt af fólki sem getur ekki hugsað sér að kjósa S því Ingibjörg er forsætisráðherraefni Samfylkingar.
Össur er hinsvegar bráðskemmtilegur og vill ganga í ESB. Það er eitthvað sem ég er til í að styðja.

Nýjasti Bloc Party diskurinn er góður.

Ég rak nefið inn fyrir svaladyrnar til að sjá Eirík taka lagið í Júróvisjón en hélt svo áfram við pallasmíðina. Ég get ekki sagt að ég missi svefn yfir því þó við dögum uppi í þessari undankeppni.

Því fyrr sem við áttum okkur á því að við erum aldrei að fara að taka þátt aftur í "alvöru" keppninni, því fyrr verða sett lög um að dagurinn eftir undankeppnina skuli vera frídagur.

Ég fékk gröfu í garðinn minn í gær og byrjaði að jafna hólinn við húsið fyrir pallasmíðinni. Að moka með svona gröfu rifjar upp fyrir manni gamla góða tíma af leikskólanum.

Pallurinn verður 25 fermetrar svo það ætti að vera hægt að grilla pulsur.

Þetta verður splendid.

Þegar ég var ungur (og vitlaus) skráði ég mig í Sjálfstæðisflokkinn. Reglulega fæ ég greiðsluseðla senda fyrir félagsgjöldum sem enda að sjálfsögðu í ruslinu, því ég hef snúið baki við þeim félagsskap spillingar og valdhroka.

Nú hringdi í mig einhver kona frá kosningaskrifstofunni og "var að kanna hljóðið í okkar fólki".
Ég sagði henni að ég væri ekki lengur "þeirra fólk". Það kemur svo í ljós fyrir borgarstjórnarkosningarnar hvort skilaboðin berast.

Ekki ætla ég að skrá mig í annan flokk, heldur hef ég ákveðið að gerast flokkshóra og kjósa það sem hentar mér hverju sinni. Fyrir nokkrum misserum var ég einstæður piparsveinn sem gerði lítið annað en að borga til ríkisins. Þá hentaði mér að "vera þeirra fólk".
Nú á ég tvö börn og vil fá eins miklar barna- og vaxtabætur og fjármálaráðherra getur borið í mig. Þá hentar mér ekki að vera í flokki sem sker niður allan slíkan munað.

Ekki það að ég væri alveg til í að sleppa barnabótunum og sleppa þá tekjuskattinum í staðinn! Eða fá hann í 10% eins og fjármagnstekjuskattinn. Hvernig væri það?

Ég tæmdi þvottakörfuna í þvottavélina áðan og gamla Nokia 7250 símanum mínum með.

Úr þvottavélinni kom tandurhreinn síminn, betri en nokkru sinni. Ég hef því slegið símakaupum á frest.

Ég gleymdi að endurnýja grettir.net og ekki í fyrsta sinn. Þannig er að grettir.net sést alltaf heima hjá mér og ég veit ekki af því að það er útrunnið fyrr en einhver lesandi bendir mér á það.

Í hin skiptin hef ég tekið eftir því nógu snemma, en nú er domain-ið horfið út af accountinum hjá dotster.com og ég get ekki endurnýjað.

Ég opnaði eldgamalt póstfang sem ég nota ekki lengur og þar - innan um sprilljón spam pósta voru reminders um að nú væri kominn tími til að endurnýja.

Nú er ég semsagt bara að blaðra út í loftið. Enginn kemur til með að lesa þetta. Ég gæti verið að skrifa þetta nakinn og enginn kæmist að því.

Hnakkus segir stórskemmtilega frá.

Mjög vont karma sem fylgir svona þjóðarrembingi verð ég að segja.