- grettir.net

Jæja, er ekki klassískt að gera upp árið á þessum tímamótum. Eða áramótum eins og gárungarnir kjósa að kalla þetta.

Ég vildi að heimilisreksturinn hefði skilað hagnaði þetta árið. Mér tókst að eyða hverri einustu krónu, bæði í sjálfan mig, bílinn og íbúðina, en tókst þó að grynnka á gömlum skólaskuldum um einhver prósent.

Ég skipti um olíufélag á árinu. Samtals gerir það ca. 250 þúsund í kassann fyrir nýja olíufélagið og rúmlega 300 þúsund í mínus fyrir það gamla, því ég er einnig hættur að versla samlokur og hverskyns varning hjá gamla olíufélaginu ( viljandi eintala ).

Alls eyddi ég 31 degi í útlöndum þetta árið. Ég er ekki búinn að taka saman hversu marga klukkutíma ég sat í flugvél, en það voru nokkrar bækur sem það tók. Fór meðal annars í fyrsta sinn til Bandaríkjanna. Ekki einu sinni, heldur tvisvar. Sá feitt fólk fyrir alla ævina. Komst að því að ég er Evrópubúi og fíla það bara vel.

Ég náði mér ekki í konu á árinu. Það var eitthvað nart, en ég náði ekki að draga neina veiði í land. Varð tvisvar skotinn, en klúðraði báðum tækifærunum. Sem var kannski gott eftir á að hugsa, því þá slapp ég við að velja jólagjöf ( grín fyrir þá sem ekki þekkja mig ).
Ég verslaði mér reiðhjól á árinu. Það var hressandi. Lærvöðvarnir eru betri fyrir vikið.

Árið var magnað vinnulega séð. Kynnist fullt af nýju skemmtilegu fólki. Sumt á ég líklega ekki eftir að hitta aftur, en það er bara eins og það er. Annað á ég eftir að vera í enn meiri samskiptum við á næsta ári. Hressandi það.

Ég sleppti því að pissa undir á þessu ári.

Ég fékk tvær hraðasektir á árinu. Það var ekkert sérlega gaman.

Ég ætla að djamma feitt annað kvöld og enda þannig árið á sama hátt og það byrjaði. Og var eiginlega allt.

...
- grettir :: gleðilegt ár kæru lesendur

... til Brasilíu!

30 dagar gott fólk, 30 dagar.. ég er að missa þvag af spenningi.

...
- grettir :: bleyjur anyone?

Auðvitað át maður sig meðvitundarlausan þessi jól eins og önnur. En einhverju er maður búinn að skila og er að verða öllu léttari á mér.

Fékk fullt af fínum pökkum líka og það var ferlega gaman. Ég á svo mikið af systkinum sem eru öll farin að gefa stráknum. Sérdeilis prýðilegt.
Við spiluðum Friends spilið á Aðfangadagskvöld. Nú er ég forfallinn aðdáandi þáttanna en ég skil ekki hvernig var hægt að klúðra "gameplay-inu" svona hrikalega og í þessu spili. Manni var skapi næst að dusta rykið af Trivial borðinu og nota Friends spurningarnar.

---

Rakst á mjög fyndna frétt á mbl.is þar sem fjallað er um biskup sem sá ástæðu til að hrekja þær samsæriskenningar sem koma fram í Da Vinci Code í jólaávarpi sínu.
Í fyrsta lagi verður maður auðvitað að átta sig á því að Da Vinci Code er skáldsaga (líkt og biblían), en í öðru lagi dettur manni í hug myndin Conspiracy Theory með Mel Gibson og Juliu Roberts, en þar er fjallað um sérkennilegan gaur sem setur fram allskyns samsæriskenningar í fréttablaði sem hann gefur út. Ein þeirra reynist rétt og reyna því vondu kallarnir að drepa hann.
Því spyr maður sig hvort einhver af kenningum Dan Browns í Da Vinci Code eigi við rök að styðjast og hafi komið við kauninn á kirkjunnar mönnum?
Sýnir manni enn og aftur að best er að trúa bara á sjálfan sig.

...
- grettir :: jólin eru hátíð áts og gjafa, no more - no less

Það hafðist í gærkvöldi. Allar jólagjafir komnar í hús. Nú þarf ég bara að pakka. Ég reyndi að kaupa pappír til þess arna í leiðinni en fann hvergi rúllu með fleiri en tveimur vafningum.
Hvað er málið með það? Er ekki hægt að fá rúllu af jólapappír sem hefur ekki dottið hálfkláraður úr rúlluvélinni? Svipað og maður keypti sér skeinir og það væru tvær blaðsíður á hverri rúllu.

Í gærkvöldi hjálpaði ég vini mínum að setja upp heimabíókerfi sem hann gaf sjálfum sér í jólagjöf. 1000 watta kvikindi sem hljómar anskoti vel. Þegar við lufsuðumst loksins niður í Kringlu var komið "Til Sölu" skilti í gluggana á íbúðunum í kring. Ég ætti kannski að fá mér eitt slíkt til að halda vöku fyrir grannanum á daginn svo hann sofi á nóttunni - það væri tilbreyting.

Í kvöld verður þegið boð um heitt kakó hjá Hr. Olves. Ég hef það á tilfinningunni að maður verði að fara annað til að fá skötu - Múlakaffi kannski? Nei, nú er ég að grínast. Lyktin ein fær mig til að æla og fá niðurgang, bæði í einu. Hræðilegt.
Ætli maður ráfi ekki þaðan eitthvað niður í bæ og kíki á jólastemminguna. Það er reyndar svo vangefið kalt núna að ég er hræddur um að tærnar detti af mér ef maður kemst ekki strax inn á kaffihús. Ég ætla samt ekki að gera þau taktísku mistök að fara niður í bæ á nýju skónum sem ég verslaði í gær. Það er ávísun á blöðrur fram á næsta ár - og tærnar detta af.

Jólasveinninn er ekki lengur vinur minn. Ég hef verið afburða þægur í ár og hvað hef ég upp úr krafsinu? Ekki eina karamellu!
Þetta segir mér bara að maður verði einfaldlega að trúa á sjálfan sig til að góðir hlutir gerist og það á ekki bara við um jólasveininn.

Jæja, gott fólk. Ég hef aflagt þann sið að senda jólakort. Svo ég segi bara við ykkur, gleðileg jól, hafið þið og ykkar fólk það sem allra best um jólahelgina og sendið áskorun til stjórnvalda um að setja lög þess efnis að ef frídagar eins og jól, nýársdagur og 17. júní ber upp á helgi, þá fái maður frí sem því nemur í vikunni á eftir.
...
- grettir :: gleðileg jólin krakkar mínir :-)

Eyddi næstum heilum vinnudegi inni í Kringlu á laugardaginn. Sem er sérlega kellingalegt. Verslaði slatta af jólagjöfum, en meirihluti tímans fór í að drekka bjór og borða súpu á Hard Rock. Sem er sérlega karlmannlegt. Fyrir utan að jólagjafirnar verða mun veglegri ef maður er búinn með tvo bjóra.

Náði svo að "slasa" mig í ræktinni í morgun. Var eitthvað að hlaupa þegar ég finn að það er sandkorn eða eitthvað í skónum. Þar sem ég átti bara tvær mínútur eftir, beit ég bara á jaxlinn og böðlaðist áfram. Þegar ég kom inn í klefa var ég kominn með myndarlegt sár neðan á tábergið. Mikið verður þetta góður mánudagur.

...
- grettir :: haltur

Meiru fíflin þessir bankaapakettir. Fyrst mæla þeir með því að fólk fjármagni íbúðirnar sínar í erlendum lánum, svo þegar krónan er orðin hress, á móti þeim endemis skeinir sem hún var á tímabili, þá verður allt í einu að veikja hana í snarhasti!
Til hvers? Til að setja þá á hausinn sem þegar eru búnir að endurfjármagna í erlendum lánum? Til að fólk rjúki til og taki ný lán svo þeir græði meira? Svo þessir bankaapakettir geti selt alla dollarana sína fyrir jólin og keypt jeppa, playstation og snjósleða fyrir hagnaðinn.

Herra Sigurður Einarsson, stjórnarformaður KB, þér eruð apaköttur.

...
- grettir :: nei takk

Lífið er búið að vera gott síðan ég setti upp Firefox. Engir popup gluggar og tóm hamingja. Extension dótið er líka æði.
Ég setti upp eitt extension sem er algjör snilld - ForcastFox - sem gefur manni veðurspánna beint á status barinn þarna niðri. Hentugt ef maður nennir ekki að kíkja útum gluggann, eða ef það er of dimmt (eins og er alltaf þessa dagana), eða ef maður vill hreinlega skipta um veður og stilla á Ríó de Janeiro veðrið.
Verst að maður getur ekki dánlódað sólinni yfir á skerið, þá væri lífið enn betra.

En hvað er maður svosem að kvarta, við fengum heila 8 daga af sól og hita í sumar. Nýtt met. Meiriháttar.

...
- grettir :: Firefox rúlar

Það er frábær grínþáttur á Stöð 2 á morgnanna sem kallast Hinir feitletruðu og fallegu (e. The bold and the beautiful). Þar er einhver glyðra búin að sofa hjá pabbanum og báðum sonunum. Þannig að nýji gaurinn sem hún er að sofa hjá er hálfbróðir dóttur hennar og föðurbróðir sonar hennar.

*æl*

---

Ég var eitthvað að spá í að byrja að taka til fyrir jólin í gær. Þá mundi ég allt í einu að ég er búinn að lofa að hýsa reunion partý á föstudaginn. Það hljómar eiginlega frekar eins og plan að þrífa bara eftir það. Kannski maður kaupi eins og eitt jólaseríu kvikindi í tilefni dagsins. Það er bara svo leiðinlegt að setja þetta upp og enn verra að taka þetta niður.
Maður á bara að hafa þetta uppi allt árið og stinga bara í samband þegar nær dregur jólum.

...
- grettir :: fékk ekkert í skóinn í nótt, svindlið eina!

Það er eitthvað skammdegis slen í mér. Eða ég er að verða veikur. Sem væri ótrúleg heppni - vera veikur yfir jólahelgina.
Það er þó enginn heppnari en Óli vinnufélagi og félagi. Missti af jólahlaðborðinu um helgina vegna hálsbólgu, braut gleraugun sín á sunnudaginn og nánast handabraut sig í knattspyrnu í gær.

Þá er nú skárra að vera með skammdegis slen.

...
- grettir :: hvar er lýsið?

Það er fátt skemmtilegra en að vera orðinn allsber, kófsveittur inni í búningsklefa og uppgötva að maður hefur gleymt handklæði.

Þá þarf maður að klæða sig aftur í sveittu fötin og leigja sér handkl... ég meina, þvottapoka á staðnum.

Hvað er málið með þessi litlu handklæði? Afhverju eru þau á annað borð framleidd?
Maður strýkur þessu yfir hausinn á sér og þá er þetta orðið blautt í gegn. Eftir það er maður bara að dreifa bleytunni.

En nóg um það. Ég er að spá í að byrja að hella upp á mig. Þrír og hálfur tími í rútuferð út á land þar sem mín bíður hlaðborð af kræsingum.

...
- grettir :: later

Haldiðið að Nóatún hafi bara ekki brunnið fyrir utan hjá mér í gærkvöldi.
Ef ég hefði verið búinn að fá myndavélina gæti ég sýnt ykkur svalar myndir.

...
- grettir :: en crap, nú þarf ég bíl til að komast í Nóatún

Var að panta mér eitt svona kvikindi. Hressandi það. Kannski maður geti þá farið að taka einhverjar myndir við einhver skemmtileg tækifæri. Eða við hvert tækifæri.

Las á mbl.is að bankarnir eru hressir og hækkanirnar þeirra farnar að minna á olíuhækkanir. Missti næstum því nýrun úr hlátri þegar einhver banka apaköttur neitaði ásökunum um samráð í sjónvarpsviðtali að það væri af og frá að þeir væru í einhverju samráði, þeir gætu sýnt fundargerðir til að sanna það.

Eins og einhver væri svo heimskur að setja viðræður um samráð í fundargerð? Bíddu.. jú, olíufurstarnir gerðu það. En þeir eru líka með olíu á milli eyrnanna.

...
- grettir :: jæja.. heim í helgarfrí, vúhú

Bravó! Ég var næstum búinn að gleyma jólahlaðborðinu á laugardaginn. Var meira að segja búinn að ráðstafa kvöldinu í annað.

Í ár verður hlaðborðið með veglegra móti og á ég ekki von á því að þurfa að taka með mér veskið, sem er gott svona rétt fyrir jólin. Jólagefur og allt það.

Litla systir hringdi í mig um daginn og hvíslaði að mér að einn bróðir minn væri búinn að kaupa sjálfur það sem ég ætlaði að gefa honum í jólagjöf. Jæja, maður verður að finna eitthvað annað þá, en gott að hafa innanbúðar manneskju sem er manns augu og eyru á hótel mömmunni.

Nú eru 49 dagar í Ríó de Janeiro ferðina og ég er að missa þvag af spenningi! Sérstaklega þegar maður skoðar veðurspærnar og það er spáð rigningu fram í næstu viku hér á klakanum, en það er að vora þarna fyrir sunnan með 30 stiga hita. Púff.

...
- grettir :: verður maður ekki að taka nokkra tíma í magadansi?

Ekki að það segi mikið um vinnuálagið þessa dagana, maður gæti verið í hálfu starfi og samt unnið myrkrana á milli.
En það er ljómandi mikið að gera, sem er gott því þá líður tíminn hratt og áður en ég veit af verð ég kominn til Brazilíu á kjötkveðjuhátíð.

Ég ætlaði að vera hrikalega duglegur um helgina, vinna, taka til og gera og græja, en endaði á að gera ekki neitt. Sem var alveg ágætt.

Ég er aðeins farinn að spá í jólagjafirnar og er til dæmis búinn að finna jólagjöf handa sjálfum mér. Það verður uppþvottavél. Leiðinlegasta sem ég geri er að vaska upp. Það verður partý þegar hún verður tengt, bæði til að skíta út öll glösin og launa nágrannanum lambið gráa fyrir eftirpartíið sem hann hélt um daginn. Það verður rokk og gini verður slett í andlit.

...
- grettir :: júhú

Eins og kom bersýnilega í ljós um daginn, þá er ég afspyrnu lélegur í bingó.

Nú hef ég fengið uppreisn æru, því það hefur komið á daginn að ég er mjög góður í Víkingalottó og hreppti ég því þann stóra í gær. Ég var aðeins búinn að vera að velta því fyrir mér hvað ég ætti að gera við peninginn, hvort ég ætti að endurnýja íbúðina, eða hreinlega að fá mér nýja, hvort ég ætti að fá mér nýjan Bimma eða bara láta minn duga og fara frekar í heimsreisu.

Það sem skyggði hinsvegar á gleði mína í morgun var að ég komst að því að fleiri en ég höfðu hreppt þann stóra, eða alls 436 manns og því fer ég með skarðan hlut frá borði og eftir nýjustu álögur ríkisstjórnarinnar lítur út fyrir að ég eigi varla fyrir vodkaflösku.

...
- grettir :: munaði ekki nema tveimur tölum