- grettir.net

Fyrir tveimur eða þremur árum (þegar FíB hætti að bjóða bílatryggingar), þá hækkuðu öll tryggingafélögin samtaka iðgjöldin af því að ungir ökumenn yllu svo miklu tjóni.

Í fréttum fyrir helgi kom fram að ungir ökumenn eru núorðið til fyrirmyndar og hefur tjóni af þeirra völdum fækkað umtalsvert.

Við eigum sem sagt von á því að tryggingarnar okkar lækki á næstunni?

---

Þegar dollarinn stóð í 108 kr hækkaði bíómiðinn í 800 kall og var dollarnum kennt um. Gott og vel.
Þegar hann lækkaði svo aftur og grettir.net hvatti fólk til að hætta að fara í bíó þangað til verð lækkaði, kom eitthvað montrassgat frá Sambíóunum og vældi í sjónvarpinu Menn virðast ekki vita hvernig kaupin gerast á eyrinni og meinti þá að kvikmyndir væru keyptar ári fyrir sýningar hér á landi - og skildi hreint ekki hvaða hvatir lægju að baki þessu "bíóverkfalli". Menn væru vísvitandi að skemma businessinn fyrir honum.

Ég hef eitt við þig að segja, montrassgat. Fyrir ári síðan var dollarinn 62 krónur. Og fyrir tveimur árum var hann 74 krónur. Svo ef bíómiðinn fer ekki að detta niður í fimm hundruð kallinn að nýju, þá kem ég aldrei oftar í bíó til þín. Þú ert sjálfur að skemma businessinn.

Hvað ætli start kostnaðurinn við að hefja bíósýningar sé mikill? Ég væri til að sjá einhverja samkeppni í þessum bransa - en ekki alltaf sömu djöfulsins skítamyndirnar í öllum húsum bæjarins.

---

Atlantsolía er að verða sama skíta batteríið og hin olíufélögin. Vegna frétta í gær um að krónan hefði veikst um 0.25% þá neyðast allir til að hækka - og Atlantsolía með.

Hvað um birgðir? Hvað um það þegar dollarinn kostaði 59 kr. í byrjun mánaðar?
Það þýðir ekkert að bjóða manni kaffi og kleinur á dælustað og vona að maður sæki bara vaselínið.

Djöfull væri ég til í að hitta anskotann sem skrifaði og setti af stað þennan email vírus sem er í gangi núna.

Ég myndi - með góðu sparki í púnginn - tryggja að helvítið myndi aldrei fjölga sér.

Hressandi þetta myrkur langt fram eftir degi - eða þannig.
Væri ekki nær að reka þessi álfyrirtæki úr landi og nota rafmagnið til að lýsa upp landið yfir verstu vetrarmánuðina?

Eyddi helginni í að hljóðeinangra svefnherbergið í íbúiðinni minni. Tvöföld ull og gifsplötur. Ef það dugir ekki til, þá veit ég ekki hvað gerir það.
Annars skildist mér að það væri búið að vera óvenju mikil þögn undanfarna daga eftir að mágkona mín á þriðju hæð fór og lét í sér heyra.

---

Það gekk svo mikið á þegar ég pakkaði íþróttadótinu mínu í morgun að ég tók minnsta handklæðið í húsinu . Það var eiginlega þvottapoki.

Í dag eru þrír mánuðir síðan ég hætti að reykja - vonandi í síðasta skipti.
Ég reyndar stalst til að fá mér einn reyk í sumarbústaða partíinu í október og ældi næstum því.

Fyrir tveimur mánuðum byrjaði ég að finna allskonar bragð sem ég hef ekki fundið í mörg ár. Fyrir einum og hálfum fékk ég fulla tilfinningu í góminn og fyrir einum mánuði hætti ég að hósta upp reykingaslími á morgnanna og gat á svipuðum tíma hlaupið fimm kílómetrana á 24 mínútum. Stefnan er sett á 19 mínútur.
Lífið er gott án vindlanna verð ég að segja. Mér reiknast líka til að ég sé búinn að spara 33600 krónur á þessum tíma, sem gerir ca. 8,4 kassa af bjór - bjór sem á eftir að bragðast mun betur í nýjum og ferskum góm.

Sko, ef þetta kemur fólki ekki í jólaskap, þá veit ég ekki hvað gerir það..

Nú stendur til að fara í vinnuferð eitthvað út fyrir borgina í þeim tilgangi að saga niður jólatré.

Sem er alger óþarfi. Ég sá að borgarstarfsmenn eru nýbúnir að planta þessum fínu jólatrjám meðfram nýju Hringbrautinni.

Þetta er granni frá helvíti.

---

Ég var að hlusta á nýja Rammstein diskinn, Rosenrot. Ansi góður! Ætli hann fáist í Skífunni? Einhvern veginn efast ég um það.

Ég fór í Skífuna um daginn með innkaupalista af góðum diskum sem mig vantar í safnið eða eru orðnir svo rispaðir að þeir eru ekki spilanlegir lengur.
Ekki einn einasti til. Svo þeir verða verslaðir á Amazon einhvern tíma í framtíðinni. Þangað til verð ég að láta mér nægja að hlusta á þá "ólöglega".

Jæja, nú er elsku internet tengingin komin með mér á nýja staðinn og grettir.net fer því vonandi að hanga uppi.
Þegar ég stakk servernum í samband hérna í Garðabænum, þá sló nú barasta út rafmagninu. Eftir smá rannsóknarvinnu, þá kom í ljós að power supply draslið hafði ekki þolað flutninginn.

Nú er grettir.net í nýjum silfurlitum, hljóðlátari kassa undir borði í stofunni. Og líður bara vel. Og mér líka.

Nú er mikið í gangi á heimilinu. Er á fullu að pakka saman mínu hafurtaski og er að flytja. Er búinn að ná mér í fína konu sem hefur boðið mér að búa hjá sér.
Það er bara hið besta mál, enda fyrirmyndar kvenmaður þar á ferð.

Grænmetisætu fegurðarsamkeppni!

Ég verð nú að segja að kálhausar sem japla eintómt grænfóður eru ekki að heilla mig.

Það vantar fleiri klósett hérna í vinnunni. Nú er búið að vera "rautt" alveg síðan á hádegi. Ætli það yrðu settar upp fleiri skálar ef ég fer út á svalir og bý til gulan poll sem frýs fyrir framan dyrnar?
Eða yrði ég kannski bara rekinn fyrir attitute problems?

Þetta er snilld. Jól á réttum tíma!

Mér finnst að jólaauglýsingar eigi ekki að fá að fara í loftið fyrr en fyrsti jólasveinninn kemur til byggða. Sem minnir mig á það. Sveinninn sá er búinn að svíkja mig ítrekað eftir að ég fór að búa einn.

Bastard!

Í glæpamyndum þar sem ódæðismennirnir eru að millifæra illa fengið fé, þá kemur alltaf svona progress bar meðan verið er að færa fé á milli. Eins og það sé færð ein króna í einu. Svo kemur "Tranfer completed" þegar féð er komið í þeirra hendur.

Ég þarf eiginlega að kvarta við bankann minn vegna þess að það er ekki nógu kúl að smella bara á einn takka og allur peningurinn fer bara í einu. Það er eiginlega bara frekar lummó.

Ég er með vetrardekkin á felgum og skipti því sjálfur. Þannig hef ég sloppið við langar biðraðir á dekkjaverkstæðunum og hlæ gjarnan illgjörnum hlátri þegar ég sé aulana í sjónvarpinu - í gúrkufréttum - búna að bíða klukkutímunum saman.

Áðan ákvað ég að tími væri til kominn að skipta. Það gekk hins vegar ekki þrautalaust.

Ég náði að snúa upp á felgulykilinn minn. Býst við að ég megi fara að slaka á í ræktinni - en það er greinilegt að lykillinn var búinn til úr innfluttu stáli en ekki þýsku skriðdrekastáli. Svo ég trítlaði út í Byko og verslaði nýjan og betri.

Með nýja lykilinn að vopni réðist ég á sumardekkin að nýju en einn bolti neitaði úr. Ég stóð ofan á lyklinum og togaði á móti. Þegar hann losnaði, hlunkaðist ég á rassinn, fékk slynk á hendina (svona eins og þegar maður lemur með járnstöng í annað járn) og þjófavarnarkerfið rauk í gang.

Þegar allir boltar voru á gangstéttinni vildi felgan ekki af. Ég togaði af öllum lífs og sálarkröftum, án þess þó að toga bílinn af tjakknum. Þá fann ég rekavið sem ég gat notað til að berja lárétt undir bílinn og neðst í felguna. Árangur! Felgan rúllaði af og út á götu.

Að ári verð ég með hinum Cocoa Puffs krökkunum í biðröðinni fyrir utan dekkjaverkstæðið.