- grettir.net

Ég er svo vanafastur að ég læt alltaf klippa mig eins og á sama stað, versla alltaf í sömu búðinni og alltaf það sama. Ég kaupi alltaf bensín á sama stað og læt alltaf smyrja bílinn minn á Smurstöðinni Klöpp, Vegmúla ( á bakvið Kaupþing, ótrúlegt en satt ).

Þeir hafa reynst mér vel, maður fær fljóta og góða þjónustu, því sé ég enga ástæðu til að breyta þó ég þurfi að leggja á mig smá krók til að komast þangað. Og annað sem mér finnst skipta gríðarlegu máli, þeir eru með eitt hreinasta klósett sem ég hef á ævinni séð. Vanalega eru klósett á verkstæðum svört af drullu, en ekki þarna. Skínandi fínt. Ekki það að maður geti ekki haldið númer 2 inni rétt á meðan bíllinn er smurður, en það er ágætt að hafa möguleikann á því ef í nauðirnar rekur.

Áðan var ég í veseni þegar viftureimin byrjaði að væla ef ég setti miðstöðina í botn ( eins og þarf þessa dagana ) og afturrúðuhitarann í gang á sama tíma ( þess þarf líka þessa dagana ).

Nema hvað, ég smelli mér í Vegmúlann og fékk strekkingu á reiminni. Þeir tóku ekki í mál að ég greiddi fyrir viðvikið, enda farnir að kannast við smettið á mér. Þetta þýðir bara eitt. Um aldur og ævi mun ég láta smyrja bílinn minn þarna og aðeins þarna.

Þetta er hlutur sem þjónustuaðilar eru ekki að fatta. Það þarf oft svo afskaplega lítið til að gleðja kúnnann ( allavega mig ). Að sama skapi þarf mjög lítið til að styggja kúnnann ( mig líka ).

Og ég er óskaplega þakklátur og kurteis kúnni líka. Ef mér mislíkar þjónusta, þá einfaldlega hætti ég að mæta. Ef þjónustan er góð, þá þakka ég kærlega fyrir mig og mæti aftur og aftur.

Ég sagði upp aukalífeyrissparnaðinum hjá Kaupþingi í gær. Það er greinilegt að óánægðir kúnnar hafa ausið úr djúpum skálum reiði sinnar yfir blásaklaust starfsfólkið undanfarna daga, því möglunarlaust og án söluræðna er ég nú ekki lengur í viðskiptum við Kaupþing-Búbba. Ég skammaði engan og lét enga fyrirlitningu í ljós, enda veit ég vel að sá sem tók við uppsögninni er áreiðanlega jafn fúll yfir þessu og aðrir.

Ímyndið ykkur hvað það verður erfitt fyrir sölumennina þeirra að pranga þessu inn á fólk á næstunni.

Annars ætla ég nú svosem ekki að taka upp hanskann fyrir sölumenn, þar sem ein af ástæðum þess að ég sagði þessu upp er í sæti númer tvö af þremur ástæðum:

1) Ég var að kaupa íbúð og get alveg notað þennan pening til að borga eins og eitt húsbréf á mánuði þessa dagana.

2) Sölumaðurinn sagði mér að þeir byðu upp á mjög hagstæð lífeyrissjóðslán ef ég myndi færa skylduna til þeirra sem ég gæti nýtt mér strax, þegar ég tjáði honum að ég þyrfti eitt slíkt til að fjármagna íbúðarkaupin. Það reyndist ekki rétt og fær hann hérmeð eina löngutöng í kaupbæti. Lífeyrissjóður Verslunarmanna hefur því fengið viðskipti mín að nýju.

3) Síðast en ekki síst og dropinn sem fyllti mælinn, tæpur milljarður í kaupréttarsamning handa hvorum kjána. 10 mills og þrjár þá í gróða hefði verið allt í lagi. Ég hugsa að maður hefði ekki eipað yfir 100 mills, þó maður hefði bölvað. En 950? Eat shit and die.

Niðurstaða þessa gríðarlanga pistils er því að við ættum að senda plebbana í smurolíuna.

...
- grettir :: já, og á síðasta ári var mínus ávöxtun. Zero tolerance gagnvart mínus vöxtum.

Til stóð að bakka í stæði fyrir utan húsið mitt. Í fjarska sá ég að bíll var á leiðinni, svo ég gef stefnuljós til hægri og set í bakk til að það færi nú ekki á milli mála hvað ég ætlaði að bralla. Þá gæti sá sem var á leiðinni einfaldlega tekið fram úr, eða einfaldlega beðið í 10 sekúndur á meðan ég kæmi mér fyrir.

Hvað gerir hann? Auðvitað keyrir alveg upp að rassgatinu á mér svo ég komist örugglega ekki afturábak. Ég læt mig renna aðeins aftur, til að sýna að ég væri að fara að bakka í stæðið sem hann er búinn að dekka, þá flautar bastarðurinn bara.

Ef það er einhvern tíma ástæða til að gefa mönnum fingurinn, þá er það í svona tilvikum. Ég skrúfaði því niður rúðuna og sýndi löngutöng í allri sinni dýrð.

Ef þú varst á ferðinni um hálf sex á Framnesvegi og kannast við atvikið, seldu bílinn og keyptu strætókort. Svona fífl eiga ekki að hafa bílpróf.

...
- grettir :: þetta var sko ekkert gamalt fólk

Lenti í alveg vandræðalegu atviki áðan. Stopp í brekku að bíða eftir umferð á móti og sat svo bara fastur þegar leggja átti í'ann. Auðvitað bíll alveg í rassinum á mér svo ég gat ekki bakkað. Svona er maður nú heppinn. Komst fyrir rest þegar ég náði að láta mig renna pínu afturábak.

Annars var Óli að rifja upp ansi hreint óheppilegt atvik sem gerðist í leikfimitíma í gamla daga, en þá afrekaði ég það að hlaupa á badmintonsúlu og brjóta í mér aðra framgeifluna. Það var nú gaman. Næstum því jafn gaman og þegar ég missti putta hérna um árið. Það náðist reyndar að gera við hvoru tveggja, annars liti strákurinn nú ansi ógæfulega út: Fastur í brekku með engan hægri þumal og bara eina framtönn.

...
- grettir :: hræðileg sjón sem það væri

Mikið var að það drullaðist til að snjóa svolítið duglega. Ég var farinn að halda að skafan yrði ekkert notuð í vetur. Gladdi mig óskaplega að sjá myndarlegan snjóbing á framrúðunni svo maður geti nú verið blautur og kaldur snemma morguns, þeim til samlætis er biðu eftir strætó fyrir utan húsið mitt.

...
- grettir :: eða ekki.

Ég get stundum verið svo mikill Alzheimer sjúklingur að það er ekki fyndið.

Á þessari önn er ég í einum kúrs í skólanum ( I know, ég er eilífðarstúdent ) og ætti ekki að vera neitt mál að massa það inni í schedule-ið. Á önninni gleymdi ég að mæta í miðannarprófið. Einn morguninn vaknaði ég bara, ætlaði að fara að prenta út glærur fyrir tímann, þá er bara miðannarpróf í góðu sprelli.

Skyrið stóð í mér og ég ákvað að sleppa því bara, enda ekki búinn að lesa staf.

Nú er ég að læra fyrir lokapróf í faginu og stóð í þeirri meiningu að prófið væri á þriðjudag. Ætlaði að nota morgundaginn til að læra. En surprise surprise. Prófið er víst á morgun. Nú verður maður bara að hella upp á kaffi, hætta að fikta í typpinu á sér og fara að gera eitthvað.

...
- grettir :: damn, hvað maður getur verið vitlaus.

Sönn bankasaga.

Ég er í stjórn ágæts félags sem veltir uþ.b. 2.2 milljónum á ári. Félagið er aldrei í mínus og langoftast er góður slatti inn á reikningnum. Á árinu heldur þetta ágæta félag nokkra viðburði og millifærir þá beint inn á þann sem veitir félagsmönnum þjónustu.
Í hverjum mánuði kemur ein innlögn frá félaginu inn á reikninginn, samtals 12 stykki innlagnir.

Í ársreikningum félagsins kemur fram að bankakostnaður hafi verið 1200 kr. ( u.þ.b. ) og vextir 600 kr. SEX HUNDRUÐ KRÓNUR.

Nú þýðir ekki að einhver rotinn pólitíkus komi í sjónvarp og segi mér að bankarnir séu bara að græða á gengishagnaði og bréfabraski.

Nú ættum við að taka okkur saman og stofna launareikninga erlendis. Minnsta mál er að stunda öll sín bankaviðskipti í gegnum erlenda banka og gefa þessu drulluháleistum fokk fingurinn. Ég er ekki í nokkrum vafa um að erlendir bankar væru til í að veita manni lán á góðum kjörum til að losna undan vaxtaokri glæpastofnanna hér á landi.

...
- grettir :: vaselín?

Alvarlegt umhverfisslys átti sér stað í kjammanum á mér í kvöld þegar ég var að háma í mig kótelettur, a la grettir.

Lítil beinflís kom sér pent fyrir ofan á einni fyllingu í trantinum og urðu áhrifin svipuð og þegar maður missir sjampóbrúsann í baðkarið. Svona sulluáhrif. Vatn jafnar sig fljótlega. Tannfyllingar augljóslega ekki.

Nú er fyllingin eins og drullumall sem slettst hefur í allar áttir en hætt við á miðri leið.

...
- grettir :: og ég sem er nýkominn frá tannsa.

Á föstudaginn sá ég í fyrsta sinn vetnisstrætó taka vetni án þess að múgur og margmenni væri með nefið og myndavélar á staðnum.

Þetta minnti mig á þá gömlu, blautu, köldu og vægast sagt ömurlegu daga þegar ég vann í frystihúsi. Ef keypt var ný vél á staðinn, stóðu apakettirnir í hvítu sloppunum og fylgdust spenntir með hvernig græjan vann.. í nokkra daga. Svo var ekkert skemmtilegt lengur. Bara venjuleg vél sem spændi fiskinn í sig hraðar en gamla vélin sem var komin út í horn. Svo kláraðist alltaf fiskurinn fyrir rest og þá var hægt að senda alla heim degi fyrr en ella.

Svona eru vetnisstrætóarnir að verða í dag. Bara venjulegir lummó strætóar sem menga ekkert þegar þeir keyra tómir um göturnar. Og enginn nennir lengur að horfa á þegar þeir eru fylltir.

...
- grettir :: iss

Ég held að Íslendingar séu að verða vitlausari með hverju árinu. Það sem er af haustinu hef ég séð tvo þætti af Viltu vinna milljón og í báðum hefur keppandi farið út með núll krónur.

...
- grettir :: spurning um að láta ljós sitt skína?

Þar sem ég er óttalegur svefnpoki þarf ég oftar en ekki að vinna til sex eða sjö til að covera daginn.

En stundum getur verið gott að komast heim og hafa það þægilegt fyrir framan sjónvarpið með þeim sem manni finnst vænt um (mér), en það er bara ekkert hægt. Hin viðbjóðslega Oprah er á Stöð 2, barnatími í Ríkiskassanum og nú hefur Skjár Einn tekið upp á þeim ósið að hafa hinn ömurlega Dr. Phil á þessum tíma. Þessi Dr. Phil er það versta sem hefur komið fyrir sjónvarp í langan tíma.

...
- grettir :: pikk tíví kemur sterkt inn

Í gær fór ég og fullkomnaði Matrix seríuna þegar ég sá þá þriðju, Matrix Revolutions. Ég verð nú að segja að ég var ekki yfir mig spenntur þar sem mynd númer tvö voru mikil vonbrigði. Og dómarnir hafa ekki beint verið til að hrópa húrra yfir.

En maður getur nú ekki misst af endinum, eða hvað.

Kannski voru það litlar væntingar sem urðu til þess að mér fannst þetta bara tussugóð ræma. Aksjón út í gegn. Mikið af flottum bardagaatriðum og ekki hægt að segja að manni hafi leiðst eins og yfir mynd númer tvö.

Kannski eru ekki allir á eitt sáttir með hvernig sagan "endar", en ég er ekki það forfallinn Matrix aðdáandi að ég hafi verið búinn að spá og spekúlera í það hvernig plottið ætti eftir að verða, merkilegt eða ómerkilegt. Þetta er bara skemmtun. Get a life.

Og þetta er "Bíómynd". Ekki bíða með að sjá hana á vídeó, nema þið eigið þeim mun stærra sjónvarp sem framleiðir þeim mun meiri hávaða.

...
- grettir :: bara nokkuð sáttur.

Samkvæmt Tónlist.is hefur einum keppanda idol verið vísað úr keppni fyrir að brjóta fjölmiðlabann sem á að tryggja jafnræði allra keppenda, í ljósi þess að það eru áhorfendur sem velja. Og hvern eru þeir líklegir til að velja? Nú, það andlit sem þeir hafa séð oftast býst ég við.

Nú finnst mér þetta einkennilegt, þar sem að í þáttunum hefur ákveðnum keppendum verið gert mun hærra undir höfði en öðrum, með spjalli og vitleysu í nánast hverjum þætti; sbr. sjóarinn og stelpan með spangirnar frá Akureyri; á meðan aðrir eru nánast að sjást í fyrsta skipti þegar þeir syngja fyrir áhorfendur. Ekki það að þau sem ég nefndi eigi ekki alveg skilið að vera í úrslitum, en verður ekki að gæta sanngirni?

...
- grettir :: maður spyr sig...

Í mínum geira finnst fólki ákaflega skemmtilegt að halda fundi. Það eru starfsmannafundir, framvindufundir, vinnufundir, kickoff fundir og ég veit ekki hvað. Á myndinni til vinstri tákna feitletruðu dagarnir þá daga sem ég er á fundum þennan mánuðinn, oft tveir á dag. Það væri frábært að eiga ekki bíl og þurfa að ferðast með strætó út um allan bæ. Það tæki allan daginn og á þyrfti ég ekki að gera neitt nema að mæta á fundi.

Sé það fyrir mér:

Grettir, hvernig er staðan á verkefninu frá þér séð.

Ég er ekki búinn að gera neitt nema að koma mér á milli funda frá því síðast. Vantar nefnilega nettengingu í leið 12

...
- grettir :: zzZzzz

Ég sé ekki að maður komist mikið til vinnu í dag. Kyngir svoleiðis niður snjónum. Býst við að maður neyðist til að fjárfesta í vetrartúttum í dag. Ái. Þá verður manni sko illt í veskinu.

Annars var helgin bara bærileg, aðalfundur starfsmannafélagsins var haldinn á föstudaginn með tilheyrandi húllumhæi. Eins arfaþunnur og ég var á laugardaginn mætti ég galvaskur í skvass eins og ég var búinn að lofa. Fékk vöfflur í sárabætur hjá Ægi og frú.
Svo var farið í að tappa jólarauðvíninu á flöskur. Það er varla að maður tími að opna þetta, svo aðdáunarverð eru vinnubrögðin. Miðar og hettur og hvaðeina.

...
- grettir :: smá vottur af jólafíling mættur á svæðið