- grettir.net

Konan mín skutlaði mér í vinnuna í gær með hjólið í skottinu. Ég var 28 mínútur að hjóla heim og ákvað að skella mér á reiðhjólinu í vinnuna í morgun (the man powered bicycle).

Ég var rétt rúman hálftíma, 32 mínútur eða eitthvað. Helvítis brekkan úr Elliðaárdalnum (stokkurinn) er ansi sveitt.

En með þessu áframhaldi verð ég með læri eins og Hulk, maga eins og bárujárn og með þol eins og Roadrunner.

Það er síðasti dagur í dag til að láta skoða síðan tossagjaldið var sett á í haust.
Ég mætti árla morguns eða klukkan 7:55 til að ná fyrir vinnu, en fjölmargir aðrir tossar voru á undan mér, allir með númer sem enda á 4

Bíllinn er að sjálfsögðu fullkominn og rann í gegnum skoðun.

Gamli bíllinn - sem einnig er fullkominn - fær hvíldina löngu í þessum mánuði. Fyrir hann fæ ég 15.000 krónur (ennþá) í förgunargjald.

Hann er búinn að reynast mér vel, 1991 módel, keyrður næstum því 279.000 kílómetra og dettur enn í gang eins og klukka, en er orðinn svo ryðgaður að það borgar sig ekki að gera við hann.

Ég eignaðist hann fyrst í janúar 1997 og átti í eitt ár. Á því ári keyrði ég hann 31.000 kílómetra, enda alltaf á rúntinum. Þá var hann með glæsilegri bílum á götunni. Ég seldi hann áður en ég fór í nám, en fljótlega eftir að ég útskrifaðist fór ég að svipast um eftir samskonar bíl.
Í janúar 2003 sá ég auglýsingu í fréttablaðinu, dreif mig að skoða og fann þar gamla bílinn minn. Án þess að hugsa mig um keypti ég hann aftur.

Nú, sex og hálfu ári seinna líður mér eins og Marshall í How I met your Mother þegar hann þurfti að kveðja Fiero-inn sinn sem náði næstum því 200.000 mílum.

RIP gamli bíll. Ég veit það er asnalegt að sakna hrúgu af járnarusli sem stendur á hringlaga gúmmíi, en svona er þetta bara.

Ég er Grettir
Ég veit hvaða eignir ég á.
- Tvö börn og eitt hálfklárað
- Konu
- Hús
- Kastala í garðinum
- 2 gamla bíla
- Jarðaberjakassa og kartöflugarð
- Innbú sem passar í 95 fermetra

Drulluháleistarnir sem notuðu nafnið mitt í braski vita ekki hvaða eignir þeir eiga.
Enda fór sem fór með Landsbankann. Menn sem vita ekki hvað þeir eiga fara líka illa með það sem þeir eiga ekki.

Ef ég sæi annan hvorn Bjöggana á förnum vegi fengju þeir vel útilátið spark í afturendann.

Hvernig væri að úthluta öllum Íslendingum netfangi hjá island.is? Kennitala@island.is ?

Hægt væri að framkvæma kosningar með slíku auðkenni rafrænt og jafnvel skoðanakannanir á ýmsum málum sem eru umdeild.
Þannig mætti hugsa sér að þjóðin gæti fellt asnalegar tillögur með einfaldri atvæðagreiðslu í gegnum tölvupóst, rekið lélega þingmenn eða þá sem vilja ekki ljóstra upp um fjárhagslega hagsmuni sína.

Til að fyrirbyggja spam mætti hugsa sér að eingöngu mætti taka við pósti á netfangið en ekki senda og þá aðeins frá íslenska ríkinu eða stofnunum því tengdu.

Jóhanna gæti sent eftirfarandi tilkynningu (þar sem hún er flugfreyja):

Góðir farþegar.

Mikil ókyrrð er framundan. Við viljum benda ykkur að að spenna sætisbeltin og herða sultarólarnar.

Verðbólgan stefnir í 18% að nýju.

Góða ferð.

Hið svokallaða lögmannafélag var að senda frá sér ályktun í gær hvers inngangur hefst svo:
Vegna umræðu um rannsókn hins svokallaða bankahruns[...]

Tilefni ályktunarinnar er að hnýta í Evu Joly sem ætlar að rannsaka hið svokallaða bankahrun, en lögmönnum virðist vera mjög uppsigað við Evu, líklega þar sem hún gæti skrapað einhvern skít ofan af einhverjum úr þeirra hópi.

Í augum lögfræðinga er sá óhæfur til rannsóknar hins svokallaða bankahruns sem hefur einhvern tíma um það fjallað eða lýst yfir áliti sínu á því.
Á sama hátt hljóta allir lögfræðingar að vera óhæfir til að lögsækja þá sem lýsa vanþóknun sinni á lögfræðingum, því þá er lögfræðingurinn ekki lengur hlutlaus í málinu.

Ég gæti því sagt að mér fyndust lögfræðingar upp til hópa vera oflaunaðir glæpamenn með lögverndað starfsheiti og starfsleyfi til að níðast á öðrum.

Ég gæti það.

Bíllinn minn þurfti að fara í smurningu og yfirhalningu í morgun - í Hafnarfirði.

Ég tók með mér hjólið mitt og hjólaði tilbaka. Það var einkar hressandi fyrir utan það að ég fann enga hjólreiðastíga út úr Hafnarfirði.

Ferðin tók rétt um 35 mínútur.

Um mánaðarmótin afskrái ég svo gamla bílinn og við verðum bara á einum bíl. Eins gott að venja sig á hjólið strax.

Ég þurfti að leita mér upplýsinga á vef Seðlabankans vegna verkefnis sem ég er að vinna í vinnunni og fer á leitarsíðuna þeirra þar sem segir meðal annars:
Einnig er hægt að leita eftir hluta orðs, til dæmis „blind“ og leitin skilar þá niðurstöðum fyrir „blind“, „blindur“, „blinda“, „blindir“, „blindum“ og svo framvegis.

Furðulegt að nota orðið "blind" sem dæmi um leit á vef Seðlabankans, hugsa ég með mér og held áfram að lesa:
Einnig er hægt að skoða veftré vefsins og athuga hvort þar sé að finna síðu sem tengist því efni sem leitað er að.

Ef smellt er á veftréð, þá endar maður á veftré sjonstod.is

Hjálpartexti leitarvélarinnar hefur þannig verið afritaður beint af vef Sjónstöðvarinnar, án breytinga, með vísun í veftréð og hvað eina.

Hressandi vinnubrögð.

Fyrir ekki svo löngu síðan var ég að spá í hvort maður gæti ekki stofnað sinn eigin lífeyrisjóð og greitt í hann í stað þess að borga af marmaragólfum og jeppum þeirra lífeyrissjóða sem nú eru að gambla með peningana okkar.

Lífeyrissjóður Grettis hefði það eina markmið að geyma þá aura sem ég legði fyrir í lífeyrissjóð og myndi borga mér út þegar ég kæmist á eftirlaunaaldur.
Ég myndi þá ráða því sjálfur hvar ég geymdi þá peninga (í hvaða bankastofnun þ.e.a.s.) og þyrfti ekki að hafa áhyggjur af því að einhverjir glaumgosar og hvítflibbaglæponar væru að glopra þessu öllu niður í einhverjum áhættufjárfestingum - nú eða eyða þessu í einkaþotuferðir á milli landa.

Sigurjón fyrrverandi bankastjóri Landsbankans virðist hafa fengið þessa hugmynd einnig og gengið skrefinu lengra í útfærslunni svo ekki sé tekið dýpra í árinni.

Konan mín varð 30 ára í gær og héldum við heljarinnar veislu á laugardaginn að því tilefni.

Í garðinum komum við fyrir 300 lítra fiskikeri fullu af ís til að kæla öl og gos. Í matinn var humar, innbakaðar ólívur, sænskar kjötbollur og fleira gott.

Til hamingju elskan :*

Íslenskan er skrýtið tungumál.

Fleirtalan af uppkast er uppköst.

Svona svipað og fleirtalan af drafts væri vomit

En heppilegt að öll olíufélögin skyldu mistúlka nýju tollalögin sér í hag og en heppilegt að það skyldi akkúrat vera vakt á verðbreytingadeildinni þegar lögin voru samþykkt.

Skeljungur hefur lækkað en hótar því í leiðinni að hækka aftur í vikunni og leggja svo nýja tollinn á, hinir þjófarnir biðjast afsökunnar og lofa að gefa þýfið til góðgerðamála. Þá geta Skeljungsþjófarnir ekki verið minni og bjóðast til að endurgreiða þýfið gegn framvísun kvittunar!

Forstjóri Skeljungs sagði í fréttum í gær að á föstudag hafi mistúlkunin uppgötvast, en þá hafi ekki verið ráðrúm til að lækka.
Á íslensku þýðir það að þeir voru hvort sem er byrjaðir að ræna okkur og alveg eins gott að gera það alla helgina.

Þvílíkir melir.

Neytendastofa á þakkir fyrir að krefja olíufélögin svara þegar hækkunin lagðist öll á um leið og lögin voru samþykkt.

Ég tók mér hamar og sög í hönd um helgina og réðist í framkvæmdir.

Ég smíðaði jarðarberjakassa og byggði viðbyggingu við leikkastalann í garðinum ásamt því að bæta við hann rólu (sem ég á reyndar eftir að festa upp, bandið var ekki nógu langt).

Nú vantar mig bara jarðarberjaplönturnar. Og lengra band.

Við fórum líka í IKEA um helgina og keyptum okkur myndaramma, ein 30 stykki og hengdum upp á fjölskylduvegginn. Ég hengdi líka upp tvö ljós á ganginum.

Það er sko ekki setið með hendur í skauti á háteigsveginum þessa dagana enda verið að dytta að framtíðarheimilinu.

Þar höfum við það. Vinstri menn hafa lært af þeim Sjálfstæðisdindlum að nota ekki orðið skattur heldur gjald. Þá er ekki hægt að saka neinn um skattahækkanir.

10% á bifreiðagjöldin
annar bíllinn minn fer á haugana/partaður í júlí
10 kr. á bensínlítrann
best að fara að pumpa í reiðhjólið
15% á retturnar
who cares
15% á bjórinn
NEI!!

Hvers vegna í veröldinni má ekki fella niður eða minnka gjöld á innlendan bjór? Spörum gjaldeyri, aukum atvinnu og kreppan verður viðráðanlegri þegar allir eru mjúkir.


En mér finnst það ansi mikil bjartsýni að halda að við hölum inn 5 milljörðum á ári með þessum hækkunum. Fólk skrúfar neysluna niður og hættir að keyra að óþörfu. Á endanum stöndum við uppi með sömu innkomu en mun minni neyslu með tilheyrandi stöðnun hagkerfisins.

Sem BETUR FER vann ég ferðatösku í happadrættinu á árshátíðinni í vetur. Hún kemur sér vel þegar yfirgefa þarf landið í hvelli.

Guðlaugur Þór er að kvarta yfir því að þurfa að afla sér upplýsinga úr fjölmiðlum í stað þess að fá þær úr þinginu.

Þór Saari ljóstrar því hinsvegar upp að fáir (og á tímabili engir) þingmenn Sjálfstæðisflokks hafi verið viðstaddir umræður um efnahagsmál í þinginu í gær.

Guðlaugur ætti kannski að mæta í vinnuna í stað þess að hanga á netinu að afla sér upplýsinga um hvað er að gerast í þinghúsinu.

Í gær tók ég mig til og stakk upp smá órækt við hliðina á pallinum og jafnaði með grús og undirbjó jarðveginn fyrir jarðaberjakassa. Um helgina ætla ég að kaupa sprek og klastra saman einhverri snilld til að rækta jarðaber.

Á meðan ég mundaði skófluna er dóttir mín að skottast í garðinum. Allt í einu segir hún: Ég þarf að pissa og áður en ég gat sagt jarðaberjasulta var hún búin að hysja niður um sig og spræna í grasið.

Ég er svooo feginn að við vorum ekki inni í Kringlu.